मालपोतको राजश्व ६१ करोड बढी

रेवतिराज घिमिरे
भद्रपुर १७ साउन। महिलाका नाममा जग्गा रजिष्ट्रेसन पास गर्दा कम राजस्व लाग्ने भएपछि पछिल्लो समय झापामा महिलाको जग्गामा स्वामित्व बढेर गएको देखिन्छ ।
मालपोत कार्यालय भद्रपुर झापामा महिलाको नाममा जगा रजिष्ट्रेशन पास गराउनेको संख्यामा बृद्धि भएसंगै महिलाको जग्गामा स्वामित्व पनि बढेको हो । आर्थिक बर्ष २०७५/०७६ (गत आर्थिक वष) मा १५ हजार एकसय २३ जना महिलाहरुको नाममा जगा खरिद विक्री भएको कार्यालयको तथ्याङ्गकले देखाएको छ ।
यो संख्या पुरुषहरुको दाँजोमा पाँच हजार दुईसय २९ ले बढी हो । यो समयमा पुरुषको नाममा नौ हजार आठसय ९४ जनाको नाममा मात्र रजिष्ट्रेसन पास भएको देखिन्छ । राज्यले प्रदान गरेको राजश्वमा महिलालाई २५ प्रतिशत छुट दिनुका साथै श्रीमान बैदेशिक रोजगारीमा जाने र बैदेशिक रोजगारीबाट प्राप्त रेमिट्यान्सले श्रीमतिका नाममा जग्गा खरिद गर्ने क्रमले पनि संख्यामा बृद्धि आएको हुन सक्ने मालपोत अधिकृत दिपेन्द्र खत्रीले बताए ।
कार्यलयले आव २०७५/०७६ मा रजिष्ट्रेशन शुल्कवापत ४१ करोड ६० लाख ६२ हजार नौ सय ३८ रुपैयाँ तथा पुंजीगत लाभकर १९ करोड ५९ लाख छ हजार ५० रुपैयाँ सहित कूल ६१ करोड १९ लाख ६८ हजार नौसय ८८ रुपैयाँ राजश्व संकलन गरेको जनाएको छ । यो राजश्व अघिल्लो आव (२०७४/०७५) को भन्दा १३ करोड ६७ लाख ८५ हजार ६० रुपैयाँले बढी हो ।
अघिल्लो आवमा कार्यलयले ४७ करोड ५१ लाख बढी राजश्व संकलन गरेको थियो । गत आवमा कार्यालयमा २५ हजार १७ राजीनामा र १७ हजार ६६ दृष्टिबन्धक सहित ४२ हजार ८३ वटा लिखतहरु पास भएको कार्यालयले जनाएको छ ।। तपाईको नी