नम्बर नफेरेपछि कनकाई नगरपालिकाको मोटरसाइकल प्रहरी नियन्त्रणमा

सुरुङ्गा १४ कात्तिक। नक्कली नम्बर प्लेट राखेर चलाएको पाइएपछि ट्राफिक प्रहरीले कनकाई नगरपालिकाको नाममा दर्ता कायम रहेको मोटरसाइकल नियन्त्रणमा लिएको छ ।
ट्राफिक प्रहरीले नियन्त्रणमा लिएको नगरपालिकाको नाममा यातायात व्यवस्था कार्यालय बिर्तामोडमा दर्ता कायम रहेको मे १ ब ५९७ नम्बरको मोटरसाइकल इलाका प्रहरी चौकी सुरुङ्गामा राखिएको जिल्ला ट्राफिक प्रहरी कार्यालय झापाका प्रमुख प्रहरी निरीक्षक नवराज न्यौपानेले बताए ।
कनकाई नगरपालिकाको नाममा दर्ता कायम रहेको मे १ ब ५९७ नम्बरको १२५ सीसीको टीभीएस कम्पनीको मोटरसाइकलमा मे १० प ३८८५ नम्बर राखेर प्रयोग गरिएको पाइएपछि नियन्त्रणमा लिएको प्रहरीले जनाएको छ । सन २०१८ मा निर्माण भएको सो मोटरसाइकल २०७५ जेठ २७ गते श्री अटो लि. सुरुङ्गाको नामबाट कनकाई नगरपालिकाको नाममा नामसारी भएको यातायात व्यवस्था कार्यालय बिर्तामोडले जनाएको छ । कार्यालयका अनुसार नगरपालिकाको नाममा नामसारी भएपछि मोटरसाइकलमा मे १ ब ५९७ कायम गरिएको थियो । सो मोटरसाइकल जगदम्बा मोटर्स प्रालि काठमाण्डौले विरगञ्ज भन्सारबाट २०७५ साल बैशाख २८ गते इजाजत पत्र ६३६०९ मार्फत नेपाल भित्र्याएको थियो ।
श्री अटोको नाममा दर्ता हुँदा रहेको पुरानो मे १० प ३८८५ नम्बर राखेर कर्मचारीले सो मोटरसाइकल प्रयोग गरेको पाइएको छ ।
यातायात व्यवस्था कार्यालय बिर्तामोडका निमित्त कार्यालय प्रमुख पदम कट्टेलका अनुसार पुरानो नम्बर खारेज भइ नयाँ नम्बर कायम भइसकेपछि पुरानै नम्बर प्रयोग गर्नु गैर कानूनी मानिन्छ ।