झापा क्षेत्र नं. २ मा १५ दलसहित १८ जनाको उम्मेद्वारी

अर्जुनधारा ६ माघ । फागुन २१ गते हुने प्रतिनिधिसभा निर्वाचनमा झापाको क्षेत्र नं. २ मा प्रतिनिधि सभा सदस्यका लागि १८ जनाको मनोनयन दर्ता भएको छ । मंगलबार बिहान १० बजेदेखि शुरु भएको मनोनयन दर्ता प्रक्रिया अनुसार अपरान्ह्र ५ बजेसम्ममा १५ वटा राजनीतिक दल र ३ स्वतन्त्र उम्मेद्वारसहित १८ जनाको मनोनयन दर्ता भएको प्रतिनिधिसभा क्षेत्र नं. २ क्षेत्रीय निर्वाचन कार्यालयका सहायक निर्वाचन अधिकृत शुक्रराज लिम्बूले जानकारी दिनुभयो ।
मनोनयन दर्ता गराउने उम्मेद्वारहरुमा विघटित प्रतिनिधिसभाका निवर्तमान सभामुख देवराज घिमिरेले नेकपा एमालेबाट उम्मेद्वारी दिंदा, उपसभामुख इन्दिरा राना मगरले राष्ट्रिय स्वतन्त्र पार्टीबाट उम्मेद्वारी दर्ता गर्नुभएको छ । त्यसैगरी , पूर्व राज्य मन्त्रीद्वय नेपाली कांग्रेसबाट सरिता प्रसाई, नेपाली कम्युनिष्ट पार्टीबाट धर्मशीला चापागाँई, राष्ट्रिय प्रजातन्त्र पार्टीबाट भद्रप्रसाद नेपाल, नेपाल मजदुर किसान पार्टीबाट चन्द्रकुमारी गारु, मंगोेल नेशनल अर्गनाइजेशनबाट अकलबहादुर राई, श्रम संस्कृति पार्टीका केशवकुमार भण्डारी, संघीय लोकतान्त्रि राष्ट्रिय मञ्चबाट अमृता लावती, जनता समाजवादीवादी पार्टीबाट तिलबहादुर राई, नेपाल कम्युनिष्ट पार्टी (संयुक्त)बाट श्रीप्रसद सिटौला, उज्यालो पार्टी नेपालबाट चुडाकर्ण बेघा, नेपाल कम्युनिष्ट पार्टी (माओवादी) बाट अजुृनकुमार राई, जनमत पार्टीबाट रमेशकुमार राजवंशी र नेपाल जनमुक्ति पार्टीबाट मानबहादुर पुलामी मगरले मनोनयन दर्ता गरेका छन् ।
त्यसैगरी डा. युवराज संग्रौला र पुण्यप्रसाद आचार्य र रमशेकुमार कार्कीले स्वतन्त्र रुपमा मनोनयन दर्ता गरेको सहायक निर्वाचन अधिकृत लिम्बूले बताउनु भयो । उहाँका अनुसार मंगलबार नै मनोनयन दर्ताको सूची सार्वजनिक गरिने छ भने बुधबार उम्मेद्वार विरुद्ध दावी विरोधका लागि बिहान १० बजेदेखि ३ बजेसम्म समय छुट्याइएको निर्वाचन अधिकृत महेशप्रसाद खत्रीले जानकारी दिनुभयो । उहाँका अनुसार बुधबार तीनबजे पछि र बिहीबार दावी बिरोधमाथि जाँचबुझ गर्ने र निर्णय गर्ने समय तालिका तय गरिएको निर्वाचन तालिका अनुसार मनोनयन दर्ता गराएका उम्मेद्वारहरुलाई माघ नौ गते निर्वाचन चिन्ह्र प्रदान गर्ने अधिकृत खत्रीले बताउनु भयो ।