माओवादी केन्द्रद्वारा हल्दिबारीको प्रतिवद्धता पत्र सार्वजनिक

हल्दिबारी १७ बैशाख । आसन्न स्थानीय तह निर्वाचन–२०७९ का लागि नेकपा (माओवादी केन्द्र) हल्दिबारीले प्रतिबद्धता पत्र सार्वजनिक गरेको छ ।
पार्टीका गाउँपालिकाका कार्यवाहक अध्यक्ष टिका राउतको अध्यक्षता तथा नेकपा माओवादी प्रदेश अध्यक्ष हर्कबहादुर नेम्वाङ्ग (मिक्सो)को प्रमुख आतिथ्यतामा सम्पन्न कार्यक्रममा प्रमुख अतिथि मिक्सो सहित उपस्थित अतिथिहरुले प्रतिबद्धता पत्र सार्वजनिक गरेका थिए ।
प्रतिबद्धता पत्र सार्वजनिक गर्दै अध्यक्ष मिक्सोले माओवादी कोही कसैसँग नडराउने पार्टी भएको बताउँदै प्राप्त उपलब्धीको संस्थागत विकासका लागि त्याग गरेको बताउनु भयो । मिक्सोले भन्नुभयो–‘हामीले कसैसँग डराएर गठबन्धन गरेका होइनौं’ उहाँले भन्नुभयो, ‘राष्ट्रिय आवश्यकतालाई हेरेर गठबन्धन गरेका हौं ।’ हल्दिबारी माओवादीको आधार इलाका भएको उल्लेख गर्दै आधार इलाका पनि भत्काउन नखोज्न चेतावनी दिनुभयो ।
हल्दिबारी शहीद भूमि र क्रान्तिको छुट्टै इतिहास ठाउँ भएकाले पार्टीसमेत उहाँले बताउनुभयो । निर्वाचनमा होमिएका उम्मेदवारलाई जिताउन हरसम्भव प्रयत्न गर्न निर्देशन दिँदै भन्नुभयो, ‘तपाईंहरुको जीतको उत्सव मनाउन आउनेछु ।’
पार्टीका तर्फबाट अध्यक्ष पदका उम्मेदवार भवानी दंगाल (भानु) ले घोषणा पत्रबारे प्रकाश पार्नुभएको थियो । उहाँले मुलुकमा गणतन्त्र बहाली भए पनि हल्दिबारीमा हालसम्म गणतन्त्र नआएको बताउँदै भन्नुभयो, ‘हल्दिबारीमा माओवादी केन्द्रको जीतसँगै गणतन्त्र आउँछ ।’
मूलभूत रुपमा पाँच वटा विषयलाई समेटेर आफूहरु अघि बढ्ने बताउनुभयो । ‘‘झापामा तेस्रो भ्रष्टाचार गाउँपालिकामा रुपमा हल्दिबारी रहेकाले भ्रष्टाचारमुक्त पालिका बनाउने हाम्रो उद्देश्य छ’, उहाँले भन्नुभयो, ‘नागरिकता बिहीन नागरिकले नागरिकता भएका छन्, अब भूमिहीनहरुलाई धनिपूर्जा दिन्छौँ ।’
हल्दिबारीले दृष्टिकोण भएको नेता हालसम्म नपाएको चर्चा गर्दै अध्यक्षका उम्मेदवार दंगालले भन्नुभयो, ‘हामी मिसन–भिजनसहित समुन्नत गाउँपालिका बनाउँछौँ, त्यसका लागि हल्दिबारीमा हाम्रो नेतृत्व आवश्यक छ ।’ आफूहरुले जारी गरेको घोषणा पत्रमा मूलतः ८ वटा नारा समेटिएको उहाँले बताउनुभयो ।
‘हल्दिबारीको आयआर्जनको कृषि नै मुख्य आधार, कृषि उपजको बिक्री वितरणमा स्थानीय बजार’ नाराका साथ कृषि क्षेत्रको विकास र प्रबद्र्धनका लागि १६ बुँदे प्रतिबद्धता जाहेर गरिएको छ ।
त्यस्तै, ‘हल्दिबारीको खेलकूद हाम्रो पहिचान, समृद्ध पालिका बनाउन हँसिया हथौडामा मतदान’ नारा उल्लेख गरी युवा तथा खेलकुदका सवालमा १२ बु्ँदे प्रतिबद्धता व्यक्त गरिएको छ । यस्तै, महिला तथा बालबालिकाका क्षेत्रमा १२ बुँदे, शिक्षा, स्वास्थ्यमा १६ बुँदे, पर्यटन प्रबद्र्धनका लागि १० बुँदे, सामाजिक सुरक्षा तथा सांस्कृतिक विकासमा १० बुँदे, सिँचाई र ऊर्जामा ७ बुँदे, उद्योग र सहकारी, ८ बुँदे, भौतिक पूर्वाधार, नदी नियन्त्रण लगायतका विभिन्न क्षेत्रमा उल्लेख्य काम गर्ने गरी प्रतिबद्धता जनाइएको छ ।
उपाध्यक्ष पदकी उम्मेदवार तथा पार्टीकी कार्यवाहक अध्यक्ष टीका राउतको अध्यक्षतामा भएको कायक्रममा पार्टीका झापा सहइञ्चार्ज ज्योतिसिंह दर्लामी, जिल्ला संयोजक राजु आचार्य ९अग्नि०, सचिव मोहन टुडू, ३ नंं। क्षेत्रीय सहइञ्चार्ज धर्म शिवाकोटी, जिल्ला नेता बासु दुलाल, नरेन्द्र फागो लगायतका नेताहरुको सहभागिता रहेको थियो ।