विद्यार्थी आन्दोलनको एउटा परिचित र देशभर चिनिएको नाम हो–उमा शिवाकोटी । पारिवारिक पृष्ठभूमि नै प्रजातान्त्रिक भएका कारण विद्यार्थी छँदै उनी प्रजातान्त्रिक आन्दोलनमा होमिइन् । बहुदलीय ब्यवस्था नआउँदै प्रतिबन्धित अवस्थामा पार्टी रहेकै बेला उनका बुवा कपिलमनी शिवाकोटी र ठुलोबुवा सुधिरकुमार शिवाकोटी (संविधानसभा सदस्य) प्रजातान्त्रिक आन्दोलनको विगूल फुक्दै हिड्थे । सानैदेखि उनी त्यो पारिवारिक राजनीतिक माहौल नियाल्थिन् । परिवारिक प्रभावबाट प्रेरित उनी सानैदेखि आफ्ना साथीहरुलाई संगठित गर्थिन्, राजनीतिक परिवर्तन र सामाजिक विकृति विसंगतीविरुद्ध आफ्ना धारणाहरु राख्थिन् र साथीहरुको ध्यान आफूतर्फ केन्द्रित गर्थिन् । त्यही क्रममा महेन्द्र रत्न मा.वि. अनारमनीमा पढ्दा–पढ्दै उनी नेपाली कांग्रेसको भातृ संगठन ने.वि.संघ (नेपाल विद्यार्थी संघ) को कोषाध्यक्ष बनिन् २०४६ सालमा ।
निर्दलीय ब्यवस्थाका विरुद्ध बहुदलीय आन्दोलनले जेहाद छेड्दै गर्दा उनी चारतारे झण्डा बोकेर अग्र भागमा उभिन्थिन् बच्चैदेखि ।
अध्ययन सँगसँगै राजनीतिलाई अगाडि बढाएकी शिवाकोटी २०५२ सालमा नेविसंघ कन्काई क्याम्पस बिर्तामोड इकाइ समितिको उपाध्यक्ष, २०५३ सालमा सोही क्याम्पसमा स्वबियु सचिब, २०५५–०५६ सालमा स्ववियु विर्तामोड इकाइ समितिको कोषाध्यक्ष बनिन् । २०६० सालमा प्रजातान्त्रिक आन्दोलनमा हिड्ने क्रममा काठमाडौंमा प्रहरीबाट निर्घात पिटिइन् उनी । प्रहरीको पिटाइबाट हात भाँचिएकी उनी लगभग डेढ महिनासम्म अस्पतालमा बस्नुपरेको थियो ।
आफू नेतृत्वमा रहँदा निरन्तर विद्यार्थीहरुको हक अधिकार प्राप्तिका लागि अग्रमोर्चामा उभिएर स्पष्ट विचार दिन सफल उनी नेविसंघको पटक–पटक केन्द्रीय सदस्य बनिन् र सांगठनिक गतिविधिमा सक्रिय बनिन् । २०६४ सालमा नेविसंघ सहमहामन्त्रीको जिम्मेवारी कुशलतापूर्वक सम्हालेकी उनी पार्टीका हरेक गतिविधिमा उत्तिकै सक्रिय र पदमा रहँदा तथा नरहँदा पनि निरन्तर क्रियाशील छन् । महिलाहरुको हक अधिकार प्राप्ति र आर्थिक रुपान्तरणमा पनि सहजीकरण गर्ने उनी विर्तामोड नगरपालिका–४ की स्थायी बासिन्दा हुन् ।
शहीद राजन गिरी शालिक निर्माण समितिको संयोजक भएर शहीद राजन गिरीको शालिक निर्माण सम्पन्न गर्न सफल भइन् उनी । २०६२–०६३ सालमा भएको दोस्रो जनआन्दोलनका क्रममा २०६३ साल बैशाख ६ गते झापाको चन्द्रगढीमा भएको बृहद् प्रदर्शनमा प्रहरीको गोली लागेर राजन गिरी र सुरज विश्वासले शहादत प्राप्त गरेका थिए ।
शिवाकोटी नेतृत्वको निर्माण समितिले झापाको अर्जुनधारा नगरपालिका–५ मा शहीद राजन गिरीको शालिक २०६४ सालमा शिलान्यास गरी २०७० सालमा निर्माण सम्पन्न गरेको छ । पार्टीले दिएको कुनै पनि जिम्मेवारी कुशलतापूर्वक सम्पन्न गर्ने कार्यक्षमता र कार्यकुशलता भएकी नेतृ शिवाकोटी सामाजिक एवं महिला सशक्तिकरणमा पनि उत्तिकै सक्रिय छन् । विभिन्न सामाजिक संघ–संस्था, सहकारीमा पनि उनी आबद्ध छन् ।
आफूभन्दा अग्रज नेताहरु तथा समकालीन साथीभाई र विद्यार्थीमाझ पनि लोकप्रिय छवी बनाएकी शिवाकोटी २०६२–०६३ को जनआन्दोलनका क्रममा पटक–पटक जेलमा समेत परेकी थिइन् ।
नेपाली कांग्रेस नीति, अनुसन्धान तथा प्रशिक्षण प्रतिष्ठान झापाको सचिव समेत रहेकी शिवाकोटी पार्टीको १२ औं महाधिवेशनमा महासमिति सदस्य, १३ र १४ औं महाधिवेशनमा झापाबाट महाधिवेशन प्रतिनिधि छन् ।
पार्टीको १४ औं महाधिवेशनमा आइपुग्दा केन्द्रीय सदस्यमा उम्मेद्वारी घोषणा गरेकी शिवाकोटीले सम्पूर्ण महाधिवेशन प्रतिनिधिहरुको सहयोगले आफ्नो राजनैतिक जीवनलाई मार्ग निर्देशित गर्ने बताउँदै मत दिएर नेतृत्वको अवसर दिन अपिल गरेकी छन् ।
नेपाली कांग्रेसको १४ औं महाधिवेशन यही मंसिर २४ गतेदेखि काठमाडौंमा हुँदैछ । महाधिवेशनमा सहभागी हुन झापाका महाधिवेशन प्रतिनिधिहरु काठमाडौं प्रस्थान गर्न थालिसकेका छन् । विगतमा सून्यजस्तै रहेको महिला सहभागिता यसपटक नेपाली कांग्रेसमा केही मात्रामा भएपनि बढेको छ । सबैका लागि लक्षित खुल्ला कोटाबाहेक केन्द्रीय महाधिवेशनबाट ४१ जना महिलाको कोटा निर्धारण गरिएको छ ।
पदाधिकारी र समावेशी कोटासहित १३४ जना प्रत्यक्ष निर्वाचित हुने कांग्रेस केन्द्रीय समितिमा २० प्रतिशत मनोनयन गर्ने विधानतः ब्यवस्था छ । मनोनयनमा पनि समावेशी सहभागितालाई ध्यान दिनुपर्ने ब्यवस्था विधानले गरेको छ ।
